БИШКЕК, 13-мар. — Sputnik. Чылым таштоону чечкен адамдар үчүн көз карандылыкты жеңүү оңойго турбай, кайра ага кайткысы келген учурлар болот. Бул жаман адаттан арылуу үчүн жардам бере турган ыкмаларды психиатр-нарколог Василий Шуров Sputnik радиосуна айтып берди.
"Катуу көз карандылыктын бири – никотинге байлануу. Мындайда адам ар бир кыжалатчылыгын тамеки тартмайынча өткөрө албайт. Чылым таштаган алгачкы күндөрүндө адамдын маанайы да өзгөрөт, кыжырлуу болуп, ачуусу бат келет, уйкусу качат, тамакты көп жеп баштайт. Бул анын организми да тамекиге көнүп калганынан кабар берет. Тамеки чекпей койгон алгачкы эки-үч ай, айрымдарда алты ай ушундай өзгөрүүлөр менен өтөт", – деген Василий Шуров.
Ал кайрадан чылымга азгырылып кетпеш үчүн чоң мотивация керектигин белгилеген. Адам тамеки тарткысы келгенде анын жаман жактарын — ден соолугун талкалап, келечекте ракка жеткириши мүмкүн экендигин, жүрөк-кан тамыр ооруларын пайда кыларын эстеши керек. Ал эми чекпей койгондон кийин жакшы жакка өзгөрүүлөрдү тизмектеп, ал үчүн өзүн мактап туруу да артка кетүүдөн сактачу жакшы ыкма экендигин кошумчалаган.
"Тамеки чегүү – бул адат, аны таштоодо башка адаттар жардам бере алат. Бул үчүн кээ бирлер дароо Рубик кубиги оюнчугун колго алышса, айрымдар дем алуу көнүгүүлөрүн жасашат. Ар ким өзүнө ылайыктуу зыянсыз адат ойлоп тапса болот. Мындан тышкары, сагыз, чылымды таштоого жардам бере турган пластырлар менен алаксуу сунушталат", – дейт дарыгер.