БИШКЕК, 7-мар. — Sputnik. Түркиянын Куралдуу күчтөрү Ирактын түндүк тарабында Күрдстан Жумушчу партиясынын* согушкерлерине каршы ири операция жүргүзүүгө ниеттенип жатат. Бул туурасында РИА Новости Hürriyet басылмасына таянып жазды.
Маалыматта бул кадам боюнча Ирандын борбордук жана жергиликтүү бийлиги менен сүйлөшүлгөнү айтылган.
Түркиянын президенти Режеп Тайип Эрдоган буга чейин Анкара жай айларында Ирак менен болгон "чек арадагы коопсуздук маселелерин" чечерин билдирген эле. Анын айтымында, түрк тарап Сирияга 30-40 чакырым тереңдеп кирген коопсуздук коридорин түзүүгө умтулат.
"Алгач мурда операция жүргүзүлгөн аймакта эми жерден жасалган дагы бир операция уюштурулат. Анын алдында Ирактын борбордук жана Барзани үй-бүлөсү көзөмөлдөгөн Эрбил шаарынын администрациясы менен макулдашуу болгон", — деп жазган басылма.
Гезит Анкара бул иштин алкагында Ирак менен болгон 378 чакырымдык чек араны террорчулардан "жабууну" пландап турганын билдирген.
Түркиянын Күрдстан Жумушчу партиясы менен куралдуу кармашы 1984-жылы башталып, ал 2015-жылы кайрадан от алган. Ирактын түндүгүндө аталган партиянын базалары орун алып, бул аймактарда Түркиянын Куралдуу күчтөрү абадан, кургактан операцияларды жүргүзүп келет. Мосулдун түндүк-чыгышында жайгашкан Зликан лагеринде түркиялык аскерлердин турушу Багдад менен Анкаранын ортосунда ача пикирлерди жаратты. Анткен менен аталган күчтөрдүн бул жерде болушу Күрддөр партиясы менен кармашта зарыл деп айтылып келет.
* Ишмердүүлүгүнө Кыргызстанда, Россияда жана бир катар мамлекеттерде тыюу салынган террордук уюм.