БИШКЕК, 28-фев. — Sputnik. Министрлер кабинети Кыргызстанда уран жана торий кендерин геочалгындоо жана иштетүүгө тыюу салган норманы алып салууну көздөп жатат. Экономика министрлигинин бул мыйзам долбоору коомдук талкууга коюлган.
Маалым болгондой, уран жана торий кендерин геочалгындоо жана иштетүүгө тыюу салган мыйзам 2019-жылдан бери иштейт.
Министрлик тыюу салуу боюнча мыйзам калктын саламаттыгын сактоого, ошондой эле радиациялык жана экологиялык коопсуздукту сактоого багытталганы менен документ дүйнөлүк кризис маалында өлкө экономикасы үчүн терс таасирин тийгизип жатканын белгилеген.
"Атап айтканда, мыйзамды иштеп чыгуу жана кабыл алуу учурунда COVID-19 пандемиясынын экономикага терс таасири жана Кыргызстандын ири стратегиялык өнөктөшү болгон Россияга каршы санкцияларды алдын ала айтуу мүмкүн эмес болчу. Учурда Кыргызстандын экономикасы кошумча киреше булактарына муктаж", — деп жазылат негиздемеде.
Министрлер кабинети уран менен торийди казып алууда заманбап технологиялар колдонулуп, айлана-чөйрөгө зыяны аз болот деп убадалоодо.