БИШКЕК, 28-фев. — Sputnik. Жогорку Кеңештин депутаты Аманкан Кенжебаев Бишкек мэриясы кыргыз тилине көңүл бурбай жатат деп сындады.
Вице-мэр Азамат Кадыров муниципалитет иш жүргүзүүдө 79 пайыз мамлекеттик тилди колдонорун айтты. Бирок эл өкүлү бул көрсөткүчтү 100 пайызга жеткирүү талабын койду.
"Өзүңөрдүн шаардык кеңешиңер бар, талапты аткарбагандарга жаза киргизгиле. Эмне үчүн тилди көңүлгө албай жатасыңар. Балдардын тили орусча чыгып жатат. Эмнеге муну карбайсыңар? Мен ушуга таң калам да. Мамлекетти сактап калабызбы же сактабайбызбы", — деди Кенжебаев.
Мамлекеттик тил комиссиясынын төрагасы Каныбек Осмоналиев мэриянын көрсөткүчү 79 эмес, 50 пайыз экенин билдирди.
"Бирдиктүү электрондук документ жүргүзүү Infodocs системасына быйыл гана кошулду. Өздөрүнүн бир методикасы менен иштеп келишкен. Эгер булардын көрсөткүчү 79 пайыз болсо ушул жерде кол чаап, алкап отурмакмын. 50 пайызга да жетпей калды", — деди Осмоналиев.
Вице-мэр мурда иш кагаздарын автоматтык-маалыматтык системада жүргүзгөндүктөн кыргыз тилин колдонуу деңгээли толук көрсөтүлбөй калганын айтты.