Пенсиянын топтомо бөлүгүн алтынга, чет элдик валюталарга инвестициялоого уруксат берүүнү сураган мыйзам долбоору инфляцияга туруштук берип, каражатты кармап турууну көздөйт. Бул тууралуу Гүлнура Жуматаева Sputnik Кыргызстан радиосуна маек куруп жатып билдирди.
Анын айтымында, учурда Социалдык фонддо кыргызстандыктардын пенсиясынын топтомо бөлүгүнө салган каражаты 40 миллиард сомго жетти.
"Биз пенсиянын топтомо бөлүгүн учурда мамлекеттик баалуу кагаздарга гана сала алабыз. Ушул мүмкүнчүлүгүбүздү кеңейтип, алтынга, чет элдик валюталарга инвестиция кылууга жол берген мыйзам долбоорун сунуштаганбыз. Жогорку Кеңеш пенсия өз учурунда төлөнбөй калат деп кооптонууда. Жок, биз ага жол бербейбиз. Инвестицияга топтолгон каражаттын көп болсо 20 пайызы салынат, калган 80 пайызы учурунда төлөп турууга жетет. Дагы бир кооптонуу — чет элдик валюталарга салган учурда курстун куну кескин өзгөрүп кетсе абал кандай болот дешүүдө. Мында да биз абалга олуттуу таасирин тийгизе турган чоң көлөмдө салбайбыз. Ошондой эле алтынга инвестиция кылып коюп чайкоочулук менен алектенбейбиз. Ал керек эмес болсо ондогон жылдар бою сакталып тура берет. Мындай тажрыйбаны Армения, Казакстан сыяктуу башка өлкөлөр ийгиликтүү колдонуп эле жүрүшөт. Учурда кыргызстандыктардын пенсиясынын топтомо бөлүгү 40 миллиард сомго жетти. Дагы беш жылда бул сумма 100 миллиардга жетет деп божомолдоп жатабыз. Мисалы, былтыр банктар каражатыбызды албай 14 ирет депозиттик аукцион өткөрүүгө мажбур болдук. 14 ирет тең банктар алган жок. Демек, биздин каражат 3-4 айлап жөн эле жатып калды. Мындай учурда пайызы да аз болот эмеспи. Ал эми инфляция ага карабайт да", — деди Жуматаева.
Ал каражатты ар кайсы булактарга инвестициялап көбөйтүү менен кыргызстандыктардын келечектеги пенсиясынын туруктуулугу камсыздаларын кошумчалады.