БИШКЕК, 25-фев. — Sputnik. Мексика аркылуу АКШга барган өзбекстандыктар Жо Байденди сотко берди. Бул тууралуу Daryo маалымат агенттиги билдирди.
Аны менен катар Ички коопсуздук министрлигинин катчысы Алехандро Майоркаска, Иммиграция жана бажы кызматынын директорунун милдетин аткаруучу Патрик Лейххайтнерге каршы да арыз жазышкан.
Редакция жалпысынан АКШнын ар кандай иммиграциялык борборлорунда (абак) отурган 35 өзбекстандык даттанганын белгиледи.
“Алар өз арызында улуттук белгилеринин негизинде дискриминацияланып кармалганын мыйзамсыз деп жарыялоону жана адвокаттын чыгымдарын төлөп берүүнү талап кылышууда”, — деп айтылат маалыматта.
Ошондой эле алар изолятор талапка жооп бербей турганына, жактоочу менен жолугушууга чектөө киргизилгенине арызданышкан.
Учурда коңшу өлкөнүн жарандарынын дооматы соттун кароосунда турат.