БИШКЕК, 23-фев. — Sputnik. Армения Жамааттык коопсуздук боюнча кызматташуу уюмуна (ЖККУ) мүчө болууну токтотуу тууралуу билдиргенден кийин эч кандай расмий аракеттерди жасай элек. Бул тууралуу РИА Новости жазды.
Кабарга ылайык, РФ президентинин маалымат катчысы Дмитрий Песков Кремль армениялык кесиптештери менен жогоруда айтылган билдирүү боюнча тактап, деталдарын сүйлөшүү үчүн байланышка чыгарын айткан.
"Армения тарап буга байланыштуу кандайдыр бир расмий иш-аракеттерди жасаган жок. Биз ал жактагы кесиптештерибиз менен байланышып, билдирүүсүнүн чоо-жайын тактайбыз. Бул жерде мындай аракеттердин деталдарын билүү маанилүү, армениялык досторубуз бизге баарын түшүндүрүп беришет деп ишенебиз", — деген Песков.
Буга чейин Армениянын премьер-министри Нокол Пашинян республика ЖККУга мүчө болууну токтотконун билдирген. Бул тууралуу ал France24 телеканалына курган маегинде айтканын РИА Новости жазган.
"Биздин оюбузча, Жамааттык коопсуздук боюнча кызматташуу уюму жөнүндө келишим Арменияга карата аткарылган жок, өзгөчө, 2021-2022-жылдары. Биз буга көз жумуп коё алган жокпуз. Келишимге кирүүнү токтото турабыз. Алдыда кандай болорун көрөбүз", — деген ал.
Ереван буга чейин да ЖККУ менен Москваны бир нече ирет милдеттерин аткарбайт деп айыптап келген. Январь айында Армениянын Коопсуздук кеңешинин катчысы Армен Григорян алардын республикасы ЖККУдан эч кандай үмүт артпай калганын белгилеп, өлкөгө масштабуу кол салуу болгондо, 2022-жылдын сентябрында уюмдан оңдуу жооп болбогондугун жүйө келтирген.
Ал эми өкмөт башчы Никол Пашинян ЖККУнун 23-ноябрда Минскиде өткөн саммитине катышуудан баш тарткан.
Айтса кетсек, ЖККУга алты өлкө: Армения, Беларусь, Казакстан, Кыргызстан, Россия жана Тажикстан кирет. Россиянын коргоо министри Сергей Шойгу өткөн жылдын май айында ЖККУнун алкагында биргелешкен ыкчам-аскердик машыгууларга Еревандын катышуусунун маанилүүлүгүн белгилеген.