БИШКЕК, 20-фев. — Sputnik. Россия менен биргеликте инфекциялык илдеттердин эпидемиологиясын изилдеген илимий борборду ачуу ата мекендик инфекционисттердин ишин жакшыртууга шарт түзөт. Бул тууралуу Республикалык карантиндик жана өзгөчө коркунучтуу инфекциялар борборунун директорунун орун басары Нурболот Үсөнбаев билдирди.
Ал "Борбор Азия мамлекеттери менен биологиялык коопсуздукту жана эпидемиологиялык абалды көзөмөлдөө жаатында кызматташуунун келечеги" аттуу тегерек столдо презентация жасады. Анын бир пункту Россия менен инфекциялык илдеттердин эпидемиологиясын изилдеген илимий борбор ачуу маселесине байланыштуу болду. Директордун орун басары келишим ратификацияланганын белгиледи.
"Лаборатория кызматкерлери үчүн биокоопсуздук жогорку деңгээлде болот. Секвенирлөө жана башка тереңде жаткан жумуштарды жасоо үчүн кандайдыр бир технологияларга колубуз жетип калат деп ойлойм. Бул жакшы жаңылыктын бири. Учурда борбордун жобосунун үстүндө иштеп жатабыз. Диагностика жана өзгөчө кооптуу инфекциялык козгогучтарды аныктоо боюнча ишибиз жакшырат", — деди Үсөнбаев.
Бишкекте аталган борбор ачылса коронавирус штаммын ошол жерден аныктоого мүмкүнчүлүк түзүлөт. Буга чейин алынган анализдин үлгүлөрү Россия, Германия жана Улуу Британияга жөнөтүлчү.
Эске салсак, келишим өткөн жылдын жай айларында ратификацияланган. Буга чейин Үснбаев билдиргендей, келишим боюнча изилдөө борборун Россия курат. Объект Республикалык карантиндик жана өзгөчө коркунучтуу инфекциялар борборунун базасында салынмакчы. Россия тарап жергиликтүү адистерди окутуп, борборду куруп, андан соң Кыргызстандын Саламаттык сактоо министрлигине өткөрүп берет.