БИШКЕК, 17-фев. — Sputnik. Ысык-Көл облусун өнүктүрүү фонду мамлекетке 192 миллион 843 миң сом зыян келтиргени аныкталды. Бул тууралуу Башкы прокуратуранын маалымат кызматы кабарлады.
Билдирмеге караганда, көзөмөл органынын кызматкерлери аталган фондду текшерген.
"Анда фонддун жооптуу кызмат адамдары 2019-2022-жылдар аралыгында кызматтык абалынан пайдаланып, мамлекеттик органдардын кызмат адамдары жана жеке жактар менен коррупциялык байланыш түзүп, айрым жеке тараптардын кызыкчылыгы үчүн каражатты мыйзамсыз бөлүштүргөн бир катар коррупциялык аракеттерге барышкан. Мунун натыйжасында мамлекетке 192 миллион 843 миң сом зыян келтирилгендиги аныкталды", — деп жазылат маалыматта.
Текшерүүнүн жыйынтыгы менен Башкы прокуратура Кылмыш-жаза кодексинин 336-беренеси ("Коррупция") боюнча иш козгоп, тергөө жүргүзүүнү УКМКга тапшырганы айтылды.