БИШКЕК, 14-фев. — Sputnik. ЖККУнун Бириккен штабынын жетекчиси Андрей Сердюков брифингде Борбордук Азия региону үчүн кооптуулук жараткан жагдайларды санап берди.
Анын айтымында, аскердик коопсуздуктун бир катар негизги булактары жана тобокелдиктери бар. Сердюков жамааттык коопсуздуктун үч аймагы бар экенин белгилеген. Аларга Чыгыш Европа, Кавказ жана Борбор Азия кирет. Бириккен штабдын жетекчиси экинчи чөлкөмдө айрым мамлекеттердин Түштүк Кавказдагы позицияларын бекемдөө, Каспий деңизинин ресурстарына жетүү жана Борбор Азияга түз чыгуу аракетин белгилеген.
"Борбор Азия чөлкөмүндө кооптулук ИМ* жана Аль-Каида* сыяктуу эл аралык террордук, экстремисттик уюмдардан жана башкалардан келет. Анын ичинде Тажикстандын түштүгүндөгү чек арага жакын жерде "Ислам мамлекетинин" афган филиалынын жана Пакистандын талибдер** кыймылынын саны көбөйгөнү байкалууда. Аларды даярдоо боюнча талаа лагерлеринин түйүнү кеңейип жатат. Ошол эле учурда чет элдик согушкерлердин негизги контингенти Афганстандын түндүк провинцияларында топтолгон", — деген ал.
Мындан тышкары, Сердюков кырдаалдын начарлашына өкмөттүк аскерлер менен оппозициянын ортосундагы тирештин уланышы, улуттук жана диний азчылыктарга кысым көрсөтүү, ошондой эле экономикалык абалдын деградациясынан улам миграциялык агымдын көбөйүшү шарт түзүшү мүмкүн экенин белгилеген. Буга катар эле баңгизат ташуу, курал-жаракты мыйзамсыз таратуу аймактагы криминалдык абалга терс таасирин тийгизип жатканы кошумчаланды.
* Кыргызстанда, Россияда жана башка бир катар өлкөлөрдө тыюу салынган террордук уюм;
** террордук аракеттери үчүн БУУнун санкцияларындагы уюм.