БИШКЕК, 14-фев. — Sputnik. Бишкек — Нарын — Торугарт жолундагы Боом капчыгайына кире бериштеги каттама жасап саткан "Апамдын чайы" коомдук тамактануучу жайында иштегендер өлкө башчы Садыр Жапаров менен УКМК төрагасы Камчыбек Ташиевге кайрылуу жасашты.
Алар буга чейин бийлик мартка чейин көчүүнү талап кылганын айтып, бирок берилген мөөнөт өтө аз болуп жатканын белгилешкен.
"Темир жолго жакын жайгашкансыңар, көчкүлө" деген. Ага деле макул болдук. Бирок кар жаап, күн жылый элек. Мартка чейин берилген мөөнөт өтө аз болуп жатат. Анын үстүнө айыл өкмөт жер да бере элек. Ал жакка көчүш үчүн убакыт керек. Азыр бизди алып салса кредит, ипотекалар бар, аларды кантип төлөйбүз? Ал жакка көчкөндөн кийин суу, электр жарыгын тартыш керек", — деген чогулгандардын бири.
Эске салсак, буга чейин Транспорт жана коммуникациялар министрлиги "Апамдын чайын" азыркы турган жеринен Ак-Мөөр тилкесин көздөй ("Муздак-Суу") көчүрүү сүйлөшүлүп жатканын маалымдаган. "Кыргыз темир жолу" ишканасы ал кафелер поезд жолго жакын (6 метр аралыкта) кооптуу жерде жайгашканын билдирди. Андан сырткары, санитардык эрежелер сакталбай, газ баллондорду коюп, темир жолдун жанына автоунаалар токтотулуп, балдар ойноп чыккан учурлар болорун айтышкан.