БИШКЕК, 9-фев. — Sputnik. Улуттук госпиталдын дарыгерине кол салуу окуясынан улам 14 невролог жумуштан кетүү боюнча арыз жазды. Бул тууралуу медицина кызматкерлеринин профсоюзунун жетекчиси Бермет Барыктабасова билдирген.
Анын айтымында, буга чейин бейтаптын тууганы медиктер койгон диагнозго нааразы болуп, дарыгерди чачтан алып сабаган. Ал эми экинчи тарап дарыгер 100 миң сом талап кылганын билдирген. Барыктабасова бул окуядан кийин Саламаттык сактоо министрлиги дарыгерлерди урушуп, ур-токмокко алынганына өздөрү күнөөлүү экенин, мындай бейтаптарды кабыл алуунун кереги жоктугун айтканын маалымдаган.
"Дарыгерлер алардын ар бири системалуу түрдө ушундай жагдайга туш болуп жатканын айтышты. Жабыркаган кесиптештер мындай окуялардан кийин неврология бөлүмүндө иштегиси келбей, жумуштан кетүү боюнча арыз жазышканын билдиришти", — деди ал.
Улуттук госпиталдын башкы дарыгери Бакыт Төлөгөнов бул боюнча билдирүү жасап, чындап эле арыздар жазылганын, бирок кагаздар ага жетпегенин айтты.
"Мен дарыгерлер менен жолугуп, эки саат сүйлөштүм. Топтолгон суроолорун берип, бейтаптар менен болгон окуяларды айтышты. Ошондон улам арыздар жазылган. Алардын кетүүсүнө жол берген жокпуз жана бербейбиз деген ойдомун", — деди башкы дарыгер.
Ал келе жаткан дүйшөмбүдөн тарта Улуттук госпиталга жумушка күзөтчү (ИИМдин күзөт кызматы) алынарын билдирди. Мындан тышкары, нөөмөттө турган эки адамга жардам берүү үчүн медициналык жогорку окуу жайлардан бирден дарыгер бөлүп берүү боюнча сүйлөшүүлөр жүрүп жатканы айтылды. Бул бейтаптарды кабыл алууда чоң жардам болмокчу. Төлөгөнов каттоо процессин ылдамдатуу үчүн кошумча компьютерлер болорун кошумчалады. Ал ошондой эле дарыгерлер чакыртылып, сөгүш алды деген маалыматты четке какты. Башкы дарыгердин айтымында, окуядан кийин Улуттук госпиталга атайын комиссия келип, арыз боюнча иликтөө жүргүзгөн. Дарыгерлерден түшүнүк кат алынып, суроолор берилген.