БИШКЕК, 9-фев. — Sputnik. Кыргызстанда 106 фостердик үй-бүлө бар, ал жактарда 207 бала тарбияланат. Бул тууралуу Эмгек, социалдык камсыздоо жана миграция министрлигинин маалымат кызматы кабарлады.
Билдирмеге караганда, фостердик үй-бүлө уюштургандардын бардыгы министрлик менен келишим түзгөн. Министрдин орун басары Жаңыл Алыбаеванын айтымында, былтыр ата-энеси мигрант болуп кеткен жана турмуштук оор кырдаалга кабылган балдарды аныктоо максатында соцкызматкерлер дээрлик 326 миң үйдү кыдырышкан. Анын жыйынтыгында 88 миң баланын ата-энеси миграцияда экени аныкталып, ата-энелер менен балдарды камкордукка алуу зарылдыгы тууралуу иштер жүргүзүлгөн.
"Бул иштен кийин 57 бала фостердик үй-бүлөлөргө, 53ү интернатка жөнөтүлгөн. Учурда 137 интернатта 9,9 миң бала жашайт. Алардын 5 пайызынын гана ата-энеси жок, калгандарынын ата-энеси бар", — деген министрдин орун басары.
Фостердик үй-бүлө кароосуз калган наристе, өспүрүмдөрдү убактылуу асырап берет. Алар жетим балдарды, ата-энеси соттолуп же дайынсыз жоголуп кеткендердин, ден соолугу начар болгондуктан өздөрү карай албаган адамдардын чүрпөлөрүн да камкордукка алат. Ошондой эле ата-энеси көп убакытка чет өлкөгө мигрант болуп иштеп кеткен, таштаарга жери жоктордун балдарын да карайт. Бирок толугу менен асырап албайт, мамлекет менен түзүлгөн келишимде көрсөтүлгөн мөөнөткө чейин эле бага алат.