Айрым мамлекеттик кызмат көрсөтүүлөрдү аутсорсингге берүүнүн жолдору каралууда. Бул тууралуу Анара Тиленова Sputnik Кыргызстан радиосунда маек куруп жатып билдирди.
Анын айтымында, бул демилге калкты тейлөөнү оптималдаштыруу максатында көтөрүлүүдө.
"Учурда паспортту алмаштыруу жана башка мамлекеттик кызматтарды көрсөтүүнү жеке жана юридикалык тараптарга өткөрүп берүү каралууда. Ага ылайык, жогоруда кеп болгон кызматтарды нотариус, банктар жана башка мекемелер аркылуу тариздөө каралууда. Башкача айтканда, бул кызматтар аутсорсингге берилсе, ал компания, мекеме, уюмдар документтерди гана кабыл алат. Ал эми ал документтерди берүү, көзөмөлдөө мүмкүндүгү Санариптик өнүктүрүү министрлигинде эле калат. Анткени мыйзам боюнча, документтердин туура кабыл алынганын, андан аркы процедураларын мамлекеттик орган жүргүзүшү керек. 2019-жылдан бери жергиликтүү өз алдынча башкаруу органдарынын кызматкерлерине ушундай ыйгарым укуктар берилип, айыл өкмөттөр жети мамлекеттик кызматты көрсөтүп жатат. Бул демилгенин максаты — мамлекеттик кызмат көрсөтүүнү оптималдаштыруу. Маселен, айрым айылдар калкты тейлөө борборлорунан алыс жайгашкан. Ошол эле учурда ал жакта банктын кеңсеси же нотариус болушу ыктымал. Ошолор аркылуу алыс барбай тийиштүү мамлекеттик кызматты алууга болот. Бул калктын убактысын, каражатын үнөмдөйт", — деди Тиленова.
Ошондой эле ал аталган сунуш учурда мамлекеттик органдар тарабынан каралып жатканын кошумчалады.