БИШКЕК, 5-фев. — Sputnik. Польша Сейминин (парламентинин) вице-спикери Кшиштоф Босак Polsat телеканалынын эфиринде сүйлөп жатып президенти Анжей Дуданын Крым Украинага караганда Россияга көбүрөөк тиешелүү деп айтканына макул экендигин билдирген. Бул туурасында РИА Новости билдирди.
Ишемби күнү президент Дуда Kanal Zero эфиринде сүйлөп жатып Крым тарыхый жактан Россияга тиешелүү болгонун белгилеп, Киевдин ага көзөмөл орнотуусунан күмөн санаганын айткан.
"Президент туура айтты. Польшада украиналык саясатты таңуулоого аракет кылгандар бар, бирок биз бул жерде украин дипломатиясынын жасап жаткандарын кайталаш үчүн отурган жокпуз", — деди Польша Сейминин вице-спикери Кшиштоф Босак.
Вице-спикер Украина Польшанын саясий жактан өз орду менен туура жасалган мамилесин күтсө, анда өздөрү да талапка жооп бергендей кадам ташташын белгилеген.
"Эгерде Украина ушундай болушун кааласа, бизди буга тартышы керек, азырынча андай нерсени көргөн жокпуз. Украинадан агып келген айыл чарба товарлары боюнча чатакта чечиле элек маселелер бар. Чечилбей жаткан тарыхый суроолор турат. Бири-бирибизди тартипке көндүрүп, Крым украиндерге караганда орустардыкы экенин далилдешибиз керекпи? Бул мен үчүн кызык болуп жатат", — деген ал.
Дуданын Крым боюнча айткандары Польшада ар кыл пикирлерди жаратты. Жааган сындан кийин президент Х социалдык тармагына Варшаванын жарым аралдын Россияга таандыктыгын тааныбай турган позициясын бекемдеген постун жарыялаган.
2014-жылы мартта Украинадагы мамлекеттик төңкөрүштөн кийинки жалпы элдик добуш берүүнүн жыйынтыгы менен Крым россиялык аймак болуп калган. 2014-жылдагы тарыхый бул референдумда Крымдагы шайлоочулардын 96,77 пайызы жана севастополдуктардын 95,6 пайызы Россия Федерациясына кошулууга макулдугун билдиришкен.
Украина Крымды мурдагысындай эле өзүнүн аймагы катары санап, убактылуу басып алынган деп эсептейт. Батыштын көп мамлекеттери бул маселеде Киевди колдойт. РФ жетекчилиги Крымдын жашоочулары демократиялык жол менен, эл аралык укуктардын негизинде жана БУУнун Уставына ылайык Россияга кошулууну тандап алгандыгын билдирип келет. Россия лидери Владимир Путиндин айтымында, Крым маселеси "таптакыр жабылган".