2022-жылы 117 миӊ тонна минералдык жер семирткич ташылса, 2023-жылы 138 миӊ тонна алып келинди. Жыл сайын дыйкандардын жер семирткичке болгон талабы жана муктаждыгы өсүүдө. Бул тууралуу Жалилбек Тойматов Sputnik Кыргызстан радиосунун эфиринде маек куруп жатып билдирди.
Анын айтымында, өлкөгө жер семирткичтер Россия, Казакстан жана Өзбекстандан ташылат.
"Өлкөнүн минералдык жер семирткичтерге болгон жалпы муктаждыгы бүгүнкү күндө 286 миңден ашык тоннаны түзөт. Анын ичинен Кыргызстандын дыйкандары 163,6 миң тонна азот жер семирткичтерине, 105,8 миң тонна фосфордук жана 17,3 миң тонна калий минералдык жер семирткичтерине муктаж. Кыргызстан бул жаатта толук импортко көз каранды. Быйыл компаниялар дыйкандардын сатып алуу мүмкүнчүлүгүнө жараша 153 миӊ тонна минералдык жер семирткич ташып келүүнү пландап жатат. Үстүбүздөгү жылдын биринчи айында Кыргызстанга 9,9 миӊ тонна минералдык жер семирткич ташып келинди. Аны Шопоков шаарындагы "Ак-Суу трейд" ишканасынын соода түйүнүнөн, Ош облусунун Кара-Суу районундагы "Смарт импекс юг" компаниясынын сатуу пунктунан, Айыл чарбаны колдоо борборунун аймактык чекене жерлеринен жана "Бай дыйкан" айыл чарбаны колдоо борборунун Баткен, Ош, Жалал-Абад, Талас, Ысык-Көл жана Чүй облустарындагы түйүндөрүнөн сатып алса болот", — деди Тойматов.
Ал келечекте өлкө өзүн толук жер семирткич менен камсыздоого өтөрүн айтып, өткөн жылы Айыл чарба министрлиги кытайлык "Бэй Доу Цзя" компаниясы менен республикада жер семирткич чыгаруучу завод куруу боюнча инвестициялык макулдашууга кол койгонун кошумчалады.