БИШКЕК, 4-фев. – Sputnik. Президенттик борт менен Түркиянын адистештирилген клиникаларынын бирине 4 кыргызстандык дарыланууга жөнөтүлдү. Бул тууралуу медиа штаб билдирди.
Алардын экөө ТЭЦтеги жарылуудан жабыркагандар болсо, экөө – аскердик тик учак кулаганда жаракат алгандар.
Бейтаптарды үй-бүлө мүчөлөрү жана эки кыргызстандык дарыгер коштоп кетти.
Эске салсак, Бишкек ТЭЦтеги жарылуудан беш адам жабыркап, үчөө ооруканага жаткырылган. Медиктер экөөнүн абалы оор экенин билдирген. Ал эми 17-январда кулаган тик учак кырсыгында 10 аскер жабыркап, бирөө каза тапкан.