БИШКЕК, 4-фев. — Sputnik. Кандагы холестериндин көбөйүшү жүрөк ооруларын гана эмес, буттагы кан айланууну да начарлатып, ал тургай гангренага алып келиши мүмкүн. Бул тууралуу хирург Армен Авакян Sputnik радиосуна курган маегинде айтып берди.
Адис түшүндүргөндөй, канда холестерин көбөйсө атеросклероздун өрчүшүн шарттайт. Бул – жүрөк жана кан тамыр ооруларын пайда кылуучу, ошондой эле адамдардын аксап басуусуна алып келүүчү факторлордун бири.
"Баштапкы этаптарда адам басканда буту ооруп баштайт. Андан соң атеросклероз өрчүп отуруп гангренага алып келиши мүмкүн. Мисалы, бутка кан жүгүрбөй калса кандайдыр бир жаракат алганда айыгып кетпейт, кан барбаса айыкпайт да. Бул жагдайда адамдын бутун кесип салууга туура келиши мүмкүн", – деп эскерткен Армен Авакян.
Хириргдун айтымында, атеросклероз – бул кан тамырлардын бузулушу менен коштолгон олуттуу оору, анда кан тамырларга түрдүү бүртүкчөлөр, майлар тоңуп калган өңдүү топтолуп, кандын жүгүрүшүнө тоскоолдук жаратат. Буттагы мындай абалдын эң көп жайылган себеби – чылым чегүү.
"Кан тамырдагы атеросклероз менен бейтаптар гангренага өтүшүп кеткен этапта же кесе турганга жетип калган учурда келгенде анализдерди топтойбуз. Ошондо бейтаптардын 90 пайызы тамеки тартары белгилүү болот. Чылым чегүү сөзсүз түрдө кан тамырлардын ичкеришине алып келет, бул абал кан айланууну, өзгөчө бут, манжалардагы кан айланууну начарлатат", – деген хирург.
Ал канда холестериндин көп болушунун башка себептерине: тукум куучулук, ашыкча салмак, майлуу тамак, аз кыймылдуулукту тизмектеген. Атеросклероз илдетине кабылууну алдын алуу үчүн кандын биохимиялык анализин тапшырып туруу сунушталды.
"Мен 30 жаштан өткөндөр жылына бир жолу кандын биохимиялык анализин тапшырып турушу керек деп эсептейм. Көптөгөн көрсөткүчтөрдүн арасынан бул анализ кандагы холестериндин деңгээлин да аныктайт", – деп кошумчалаган Авакян.