БИШКЕК, 3-фев. — Sputnik. Өлкөдө майыптыкты күбөлөндүрүүдөн өтүү, кайра күбөлөндүрүү, майыптык фактысын аныктоо жол-жоболору жөнөкөйлөштүрүлөт. Бул тууралуу Эмгек, социалдык камсыздоо жана миграция министрлиги маалымдады.
Мекеме билдиргендей, мурда бул үчүн медициналык-социалдык эксперттик комиссияларга ден соолугунан мүмкүнчүлүгү чектелген адамдар 11 документ топтоп беришсе, эми бир гана документ – амбулатордук карта гана керек.
Саламаттык сактоо уюмдары зарыл документтерди санариптештиргенден кийин адам медициналык-социалдык эксперттик комиссияларга бир эле жолу барышы керек болот.
Мекеменин маалыматы боюнча, учурда медициналык-социалдык экспертизаны реформалоо иштери башталды.
"Ошондой эле реабилитациялоонун жекече программасына, тактап айтканда, майыптыгы барларды ишке орноштуруу, кайра окутуу, жардамдын кошумча түрлөрү менен камсыз кылуу жана башка ушул өңдүү жагдайларды аныктоо иштерине көзөмөл күчөтүлөт", — деп айтылат маалыматта.
Мекеме 2023-2030-жылдары "Жеткиликтүү өлкө" мамлекеттик программасынын алкагында майыптыктын медициналык модели социалдык моделге өткөрүлө турганын кошумчалады.