БИШКЕК, 31-янв. — Sputnik. Балыкчыда кызды коюп кеткен адам мыйзам чегинде жоопко тартылат. Бул тууралуу Курманкул Зулушев маалымат жыйында билдирди.
Анын айтымында, учурда тергөө кылмышка шектелип жаткан Балыкчы шаардык ички иштер бөлүмүнүн жетекчиси кырсык болгон учурда мас болгон-болбогонун текшерип жатат.
"Прокуратура дароо иш козгогон. Шектүү из жашырган, бирок УКМК аны Бишкектен кармады. ШИИБ жетекчисинин агасы кылмышты жаап-жашырууга айыпталып кармалды. Жабырлануучу тарап дооматынан баш тартканы менен мыйзам чегинде баа берилет", — деди Зулушев.
Ал ошондой эле окуя этиятсыздыктан жасалган кылмышка жатарын белгиледи.
"Мында ШИИБ жетекчиси кылмыш болгон жерден жабырлануучуга жардам көрсөтпөстөн качып кеткен. Тергөө милиционер мас болгон-болбогонун текшерет", — деди Зулушев.
Эске салсак, жол кырсыгы 2024-жылдын 26-январында болгон. Анда Geely Monjaro үлгүсүндөгү автоунаанын айдоочусу 11 жаштагы кызды сүзүп кеткен. Транспорт Балыкчы шаардык ички иштер башкармалыгына таандык экени такталган. Окуя чуу жаратып, кыздын атасы видеокайрылуусунда кырсыкка шаардык милициянын жетекчилеринин бири күнөөлүү экенин айтып чыккан. ИИМ кызматтык иликтөө жүргүзүп, жыйынтыгында рулда болгом деген аймактык тескөөчү менен шаардык милициянын башчысы болуп иштеген агасын иштен алган. Алар Кылмыш-жаза кодексинин 144-беренеси ("Коркунучта калтыруу - этиятсыздыктан ден соолукка оор залал келтирген жосун") жана 312-беренеси ("Автомототранспорт каражаттарынын кыймылынын жана аларды эксплуатациялоонун коопсуздук эрежелерин бузуу - этиятсыздыктан ден соолугуна оор залал келтирген ошол эле жосун") боюнча айыпталып, кармалган.
Жабыркаган кыз Бишкектеги ооруканага которулганы, атасы тосмо арыз жазганы да айтылды.