БИШКЕК, 30-янв. — Sputnik. Украинанын Куралдуу күчтөрүнүн башчысы Валерий Залужныйдын отставкасы тууралуу жарыя кылышты. Бул туурасында Жогорку Раданын депутаты Алексей Гончаренко* айтканын РИА Новости жазды.
"Мага эки киши ушундай болгонун билдирди. Валерий Залужныйга отставкасы тууралуу айтышкан, бирок жарлык азырынча чыга элек", — деп жазган ал өзүнүн Telegram каналына.
Парламентарийдин айтымына караганда, Залужныйга Европадагы өлкөлөрдүн бирине элчилик кызматка барууну сунушташкан, бирок ал баш тарткан.
Украинаны Коргоо министрлигинен бул отставка тууралуу "жалган" деп билдиришкен.
"Урматтуу журналисттер, дароо эле айтып коелу, бул жалган сөз", — деп жазылган алардын Telegram каналындагы текстте.
Буга чейин дүйшөмбүдө Залужныйдын кызматтан кеткени боюнча Жогорку Раданын депутаты Борислав Береза да билдирген эле.
Соңку учурда Украина жана Батыштын бир катар ЖМКлары Зеленский менен алардын Куралуу күчтөрүнүн жетекчисинин ортосун кара мышык аралаганы туурасында жазган. Алардын пикири келишпей жатканын Залужный өзү да The Economist журналына берген маегинде айтып, контрчабуулдун туңгуюкка кептелгендигин мойнуна алган. Мындай ачыктык Киев режиминин кескин сындоосун жаратып, бул аскер адамына "саясатка тушмугуңду салба" деген эскертүү кылышкан.
Андан көп өтпөй Украина ЖМКлары Зеленский облустук администрациялардын башчыларына аскер жетекчиси менен кандай гана маселелер болбосун сүйлөшүп, талкуулоосуна тыюу салганын жазган. Журналисттер мындай кадамды атаандашын жок кылууга жасаган аракет деп баалашты. Былтыр жергиликтүү басылмалар Зеленский Залужныйды кызматынан алып, Коргоо министрлигин жетектөөгө коерун, мындай нерсе аны президенттик шайлоодогу атаандашы катары көрүп жаткандыгынан улам жасаларын жазышкан.
Украиналык сурамжылоолордун жыйынтыгы мындай саксынууларга негиз бар экендигин көрсөткөн. "Рейтинг" деп аталган социологиялык топтун иликтөөсү башкы командачыга респонденттердин 82 пайызы, ал эми президентке 72 пайызы ишенерин көрсөткөн. Зеленскийдин рейтинги июлдан тарта түшө баштаган.
* Росфинмониторинг террорчулар жана экстремисттер боюнча реестрине катталган