БИШКЕК, 30-янв. — Sputnik. Мамлекет башчы Садыр Жапаров кийинки президенттик шайлоого катышат. Бул тууралуу өлкө жетекчисинин маалымат катчысы Аскат Алагөзов билдирди.
"Узак мөөнөттүү, өлкө үчүн стратегиялык маанидеги эл аралык долбоорлорго старт берилип, пландалып жатканын эске алганда Садыр Жапаров экинчи мөөнөттөгү шайлоого катышат. Бул анын саясаттагы ырааттуу кадамы болот", — деген маалымат катчы.
Белгилей кетсек, Садыр Жапаров 2021-жылдын январь айында өлкө башчысы кызматына киришкен. Кыргызстанда президент беш жылга шайланып, эки мөөнөттөн ашык иштей албайт. Бирок Жапаров эски Конституция менен шайлангандыктан биринчи мөөнөтүндө алты жыл отурат.