БИШКЕК, 30-янв — Sputnik. Бүгүн Кыргызстанда төрт жолу жер титирөө катталганын Сейсмология институтунан кабарлашты.
Жер силкинүүнүн очогу Кытайдын аймагында жайгашканы менен ал Ысык-Көл облусунда да сезилген.
Түнкү саат 3:03тө жер титирөөнүн магнитудасы 4,5ке жетсе, Бедел айылында 3 балл болуп сезилген;
Саат 4:27де магнитудасы 5,9 болсо, Бедел айылында — 5 балл, Ыштык — 4 балл, Кумтөрдө 3,5 баллга жеткен;
Саат 7:44тө магнитудасы 4,7 болсо, Беделде — 3,5 балл, Ыштыкта 3 баллга жеткен;
Саат 9:52де магнитудасы 4,6 болуп, Бедел айылында 3 баллга жеткен.
Эске салсак, кыргыз-кытай чек арасында 23-январда катуу жер титиреп, андан бери улам жер силкинүүдө. Ал түнү өлкөдө жер силкинүүнүн күчү 6 баллга жеткен.