БИШКЕК, 29-янв. — Sputnik. Балыкчыда милиционер сүзүп кетти делип ооруканага түшкөн 11 жаштагы кыз Бишкекке которулат. Бул тууралуу Балыкчы шаарынын жалпы дарыгерлик практика борборунун директору Дамира Мусаева Sputnik Кыргызстан агенттигине билдирди.
Анын айтымында, алгач жандандыруу бөлүмүнө жаткырылган кыздын абалы азыр жакшы, травматология бөлүмүнө которулган.
"Кызды ата-энесинин каалоосу менен Бишкек шаарына которууну чечтик. Абалы турукташып калды. Жоон саны сынган, оң бөйрөк тарабы көгала болгон жана башынан жаракат алган. Айыгып кетүүсүнө убакыт керек", — деди Мусаева.
Эскерте кетсек, кырсык 26-январда болгон. Анда Geely Monjaro үлгүсүндөгү автоунаанын айдоочусу 11 жаштагы кызды сүзүп кеткен. Транспорт Балыкчы шаардык ички иштер башкармалыгына таандык экени такталган. Окуя чуу жаратып, кыздын атасы видеокайрылуусунда кырсыкка шаардык милициянын жетекчилеринин бири күнөөлүү экенин айтып чыккан. ИИМ кызматтык иликтөө жүргүзүп, жыйынтыгында рулда болгом деген аймактык тескөөчү менен шаардык милициянын башчысы болуп иштеген агасын иштен алган. Саламаттык сактоо министрлиги кыздын абалы туруктуу оор экенин билдирген. Бул окуя боюнча Кылмыш-жаза кодексинин 144-беренеси ("Коркунучта калтыруу - этиятсыздыктан ден соолукка оор залал келтирген жосун") жана 312-беренеси ("Автомототранспорт каражаттарынын кыймылынын жана аларды эксплуатациялоонун коопсуздук эрежелерин бузуу - этиятсыздыктан ден соолугуна оор залал келтирген ошол эле жосун") боюнча иш козголуп, Балыкчы шаарынын ички иштер бөлүмүнүн мурдагы башчысы Бектур Осмонбаев жана анын иниси (мурдагы милиционер) Бекзат Казаков Караколдогу ШИИБдин убактылуу кармоо жайына киргизилген.