БИШКЕК, 26-янв. — Sputnik. Америкалык белгилүү журналист Сеймур Херш Россия жана Кытайдын лидерлери Владимир Путин менен Си Цзиньпиндин бедели өсүп жаткан чакта АКШнын президенти Жозеф Байден согушка ыктаган тышкы саясатынан улам Израиль премьери Биньямин Нетаньяху, Украина башчысы Владимир Зеленский менен бир чөйрөдө калганын айтты. Бул туурасында РИА Новости жазды.
"Байдендин Украина менен Израилди согушта жана жакынкы мезгилдеги Йемендеги хуситтерге чабуул коюу чечимин колдогону дүйнөнүн көп бөлүгү сындап жаткан Биньямин Нетаньяху, Владимир Зеленскийлердин клубуна кошту. Мунун баары Батышта Путин менен Сиге болгон урмат-сый артып бараткан чакта болууда", — деген Херш Substack онлайн платформасындагы кезектеги макаласында.
Америка президенти Байдендин Украина менен Газа тилкесиндеги чатакка киришкенин журналист "каргаша" деп атап, хуситтерди бомбалоо чечими "саясий дүрбөлөңдүн" белгиси деди. АКШ деңизден жана асмандан жасалган чабуулдары менен Йемендин түндүгүндө башкаруу жүргүзүп келген шииттердин "Ансар Алла" кыймылына сокку урууда. Бул Палестина аймагындагы Израиль операциясына каршы аталган кыймылдын кемелерди аткылоосун токтотуу ниетинде жасалууда.