БИШКЕК, 25-янв. — Sputnik. Кызыл-Кыя шаарындагы "Сапат" кыргыз-түрк лицейинде окуучунун сабалган окуясы боюнча териштирүү иштери жүргүзүлүп жатат. Бул тууралуу Баткен ОИИБдин маалымат кызматы кабарлады.
Буга чейин социалдык тармакта эркек киши окуучуга кол көтөрүп, уруп-согуп жаткан видео тараган. Анда окуя Кызыл-Кыя шаарындагы "Сапат" кыргыз-түрк лицейинде болгону жазылган.
Облустук милиция окуя тууралуу 24-январда маалымат түшкөнүн айтып, аталган факт Бирдиктүү реестрге катталганын белгиледи. Учурда териштирүү иштери жүрүүдө.
Ал эми Билим берүү жана илим министрлигинин маалымат кызматы министрликтин өкүлдөрү тез арада ал жакка барарын билдирди.