БИШКЕК, 25-янв. — Sputnik. "Манас" эл аралык аэропорту Пекинден алгачкы каттамды тосуп алды. Бул тууралуу аэропорттун маалымат кызматы кабарлады.
Билдирмеге караганда, каттамдар Кытайдын China Southern Airlines авиакомпаниясы тарабынан жумасына үч жолу: дүйшөмбү, шаршемби жана жума күндөрү аткарылып турмакчы. Жүргүнчүлөрдү Airbus A320neo учагы ташыйт.
"Биринчи каттам менен Пекинден Бишкекке 90 киши келген. Ал эми Бишкектен Пекин шаарына 150 адам учуп кеткен", — деп айтылат маалыматта.
"Манас" эл аралык аэропортунун коммерциялык директору Сатыбек Каныбеков Кытай менен Кыргызстандын ортосундагы үзгүлтүксүз аба каттамдары туризмди өнүктүрүүгө салым кошорун белгилеген.