БИШКЕК, 24-янв. — Sputnik. Жогорку Кеңештин депутаты Кундузбек Сулайманов жакында кулаган тик учакты калыбына келтирүү үчүн мамлекеттик кызматкерлердин бир күндүк маянасын котортууну сунуштады.
Эл өкүлүнүн айтымында, бул каражатка Ми-8ди оңдоп же жаңысын алуу керек. Акчанын бир бөлүгүн каза болгон учкучтун үй-бүлөсүнө, жаракат алгандарга да жардам катары берүүгө чакырды.
Ал депутаттар дагы бир күндүк айлыгын бөлүшү керек деп эсептейт, бирок добушка койгондо сунушу өтпөй калды.
Эске салсак, 2024-жылдын 17-январында эртең менен Бишкектин батыш тарабында Ми-8МТВ үлгүсүндөгү тик учак окуу-машыгуу учурунда 23565 аскердик бөлүктүн аймагына кулап түшкөн. Кырсыктан экипаждын 29 жаштагы командири Жайыл Самудинов каза таап, 10 аскер жабыркаган. Окуя боюнча кылмыш иши ачылып, тиешелүү тараптардын иликтөөсү жүрүп жатат.