БИШКЕК, 22-янв. — Sputnik. Кыргызстанда 2023-жылы 1,6 миллион тонна дан эгини алынды. Бул тууралуу Улуттук статистика комитетинин маалыматында айтылат.
Билдирмеге караганда, жогорудагы көрсөткүч 2022-жылдагыдан 13 пайызга аз.
2023-жылдын жай айларындагы абанын өтө жогорку температурасынын кесепетинен буудайдын түшүмү 25,7 пайызга, арпанын жыйымы 29,2 пайызга азайган.
Бирок 2022-жылдын жыйынтыгына салыштырганда өткөн жылда кант кызылчасынын түшүмү 32,7 пайызга, тамеки 19,2 пайызга көп жыйналган. Жүгөрү 9,2 пайызга, жашылча өсүмдүктөрү 4,6 пайызга, бакча өсүмдүктөрү 4,2 пайызга көп алынгандыгы белгиленген.