Манаста керилген зымда басып, ар кандай оор элементтерди жасаган адам "даргачы" делет. Бул тууралуу Нурбек Талантбеков Sputnik Кыргызстан радиосунун "Көөнө сөз" рубрикасында билдирди.
Анын айтымында, эпостогу көөнө сөздөр ар бир кыргыздын күнүмдүк колдонуусуна кирсе жаңылыштык болбойт.
"Адатта циркке барганда керилген зымдан басып жүргөн адамды көрөбүз. Бул өзү күндө эле кездеше бербеген сейрек өнөрлөрдүн бирине кирет. Бирок анын кыргызча аталышын көбү эле биле бербейт. Айрым учурда бул өнөрдүн ээсин "акробат" деп орусчасын колдонгон учурлар бар. Кээде жөн эле керилген зымда баскан киши деп узарып дагы аталышы мүмкүн. Ал эми "Манаста" керилген зымда басып, ошол зымда керемет өнөрлөрдү көрсөтө билген адамды "даргачы" делгенин кездештирүүгө болот", — деди Талантбеков.
Ошондой эле ал "Манас" эпосунда көптөгөн уникалдуу маалыматтар камтылганын кошумчалады.