БИШКЕК, 17-янв. — Sputnik. Жыйырма өлкө SWIFT аналогу болгон Россия банкынын Финансылык маалыматтарды берүү системасына (СПФС) кошулду. Бул туурасында РФтин Борбордук банкынын төрагасынын орун басары Владимир Чистюхин билдиргенин РИА Новости жазды.
"Финансылык билдирүүлөрдү жөнөтүп турган системага 557 банк менен компаниялар кошулган. Алардын ичинен 159 резидент эместер — жыйырма өлкөдөн катталгандар", — деп айтылат ал өткөргөн бет ачарда.
Декабрдын башында РФтин Борбордук банкы СПФСте 16 өлкөнүн резиденти бар экенин билдирген. Бир жыл мурда алардын саны 100гө чукул эле.
SWIFT — дүйнөдөгү финансылык мекемелердин каржылык операциялары, алардын алынганы жана жөнөтүлгөнү туурасында маалымат берген система. Буга дүйнөнүн ар тарабынан 11 миңден ашык ири компания кошулган. Бир нече жыл мурда дүйнөдөгү банктык бардык операциялар жүргөн негизги система болгон. 2014-жылы Батыш мамлекеттери SWIFT системасынан Россияны өчүрөбүз деп коркутуп, ал ишке ашып, бир нече банкынан өчүрүлгөн. Андан көп өтпөй Россиянын Борбордук банкынын аталган системага атаандаш боло турган каналы ишке кирген.
Эске салсак, январдын башында Ирандын Башкы банкынын төрагасынын орун басары Мохсен Карими Москва менен Тегеран финансылык маалыматтарды жүргүзүү системаларын бириктиргени боюнча маалымат берген.