БИШКЕК, 17-янв. — Sputnik. Кыргызстандык таланттуу мектеп окуучулары Сочидеги "Сириус" илимий борборуна барышты. Бул тууралуу Кыргыз-Россия Славян университетинин маалымат кызматы билдирди.
Математика жана табигый илимдер боюнча предметтерден олимпиадага даярдануу үчүн окуу-машыгууга Кыргызстандан 24 окуучу барган. Алардын 18и — КРСУнун жалпы билим берүү мектебинин окуучулары.
Бир жуманын аралыгында Россия, Беларусь жана Кыргызстан мамлекеттеринин эң мыкты окуучулары физика, химия жана биология жаатындагы изилдөө ыкмалары менен таанышышты.
Окуучулар лекцияларга, семинарларга катышып, "Сириустун" заманбап лабораторияларында практикадан өтүшкөн. Мындан тышкары, аларга Сочи шаарында экскурсия уюштурулган.