Кичи ГЭСтерди тез арада ишке берип, арзан бүтүрүүгө болот, аларды ыңгайлуу келип жеке ишкерлер деле кура алат. Бул тууралуу Эмил Мухамбетов Sputnik Кыргызстан радиосунда маек куруп жатып билдирди.
Анын айтымында, өлкөдө чоң ГЭСтер курула электе кичи ГЭСтерден энергия алып турган учурлар болгон.
"Кыргызстан суудан эле 140 миллиард киловатт-саат электр энергиясын чыгара ала турганы изилденген. Бул жагынан КМШ мамлекеттеринин ичинен Россия, Тажикстандан кийинки орунда турат. Анткен менен өлкөнүн гидропотенциалынын 10 пайызы гана өздөштүрүлгөн. Ал эми өлкөдө электр энергиясы тартыш болуп сырттан экспорттолууда. Мына ушул көйгөйдү чечүү жолдорунун бири катары мамлекет кичи ГЭСтерди курууга басым жасоодо. Анткени чакан ГЭСтерди ишке берүү ылдам, арзан, ыңгайлуу жана аларды жеке ишкерлер деле кура берсе болот. Мисалы, учурда ишке берилүү алдында турган Бала-Саруу ГЭСине 2021-жылы президенттин катышуусунда капсула салынган. 2022-жылдын декабрында аны долбоорлоо иштери жыйынтыкталды. 2023-жылдын февралында куруучу компания менен келишим түзүлүп, бир жылдай убакытта курулуп бүттү. Салыштырганда кичи ГЭСтер ирилерге караганда абдан тез курулат. Ошондой эле белгиленген аймакты энергия менен камсыз кылуу үчүн натыйжалуу болуп саналат. Өлкөдө Токтогул, Камбар-Ата, Таш-Көмүр сыяктуу ГЭСтер курула электе электр энергияны дал ушул кичи ГЭСтерден алып келген. Маселен, 1928-жылы ишке берилген Аламүдүн каскады сегиз ГЭСтен туруп, азыр деле иштеп жатат. Мындан тышкары, жерди ээлебеш үчүн жакында эле суунун үстүндө калкып туруучу күн станциясы донорлордун жардамы менен курулду. Бул сынамык долбоор, жакшы натыйжа берсе республикага жайылтылат", — деди Мухамбетов.
Ошондой эле ал Орто-Токой суу сактагычына 21 мегаваттык ГЭС куруу пландалып жатканын кошумчалады.