БИШКЕК, 10-янв. — Sputnik. Эквадор президенти Даниэль Нобоа өлкөсүндөгү башаламандыктан, барымтага алуу окуяларынан улам ички куралдуу чатакта колдонулуучу режимди киргизди. Бул туурасында РИА Новости жазды.
"Ички куралдуу чатак болгондогу режимди киргизген жарлык чыгарып, террордук уюмдар жана согушуп жаткан мамлекеттик эмес субъектилерди түптөлүп алган кезектеги улуттар аралык кылмыштуу топтор катары аныктадым", — деп жазган ал X социалдык тармагына.
Документте мамлекеттин башчысы 20 топ менен уюмду санап чыгып, атайын операцияда алардын мүчөлөрүн жок кылууга буйрук бергени белгиленген.
Шейшемби күнү куралданган бет капчандар Гуаякиль шаарындагы TC телеканалына кирип барышкан. Алар түз эфирдеги алып баруучунун чөнтөгүнө динамит шашкасын салып жиберип, "полиция бул жерден жоголсун" деп кыйкырышкан. Тартип сакчылары студияга спецназ аскерлерин жиберип, кечирээк бир нече шылуун кармалып, элдин эвакуацияланганын айткан. Прокуратурадан студияга кирип баргандар террорчулукка айтыпталып жатканын билдиришти.
Ал арада Гуаякилде өлкөдөгү түрмөлөрдү карап чыгып, кайра түзүү боюнча чечимден кийин башаламандык уланып жатканын айтышты.
Кечээ, 9-январда, президент Нобоа абактардагы козголоңдордон улам жана бандиттик ири топтун башчысы качып кеткенден кийин 60 күнгө өзгөчө абал киргизди. Эки ай ичинде куралдуу күчтөр пенитенциардык системага көзөмөлдү кайра орнотушмакчы.
Эквадордун өкмөтүнүн иштеринен улам өлкөнүн шаарларын башаламандык толкуну каптаган. 9-январга караган түнү кылмышкерлер автобустар менен автоунааларды өрттөй баштаган. Гуаякилде колго жасалган жарылгычтардын үнү жаңырып турган.
Белгисиз адамдар бир сутка ичинде баш калаа Кито жана Мачала шаарында полициянын жети кызматкерин уурдап кетишкен. Жаза аткаруу кызматынын маалыматына караганда, кылмышкерлер түрмөлөрдө 125 кызматкер менен административдик кызматкерлерди кармап турат.
Эквадордун борбору Китонун бийлиги башаламандыктан улам коопсуздук чараларын күчөтүп, өкмөткө стратегиялык объектилерди коргоо үчүн армия тартууну сунуштады.
Нобоа Эквадордун президенттигине өткөн жылдын ноябрь айында шайланган. Ал башкы милдеттеринин бири кылмыштуулук менен күрөшүү экенин айткан. Криминалдуу кырдаал менен наркотрафик маселесин чечүү үчүн аскерлердин эсебинен чек араны бекемдөөнү сунуштаган. Андан сырткары, жаңы түрмөлөрдү куруп жана кылмышкерлердин түрүнө карата бир нече категорияга бөлүү туурасында айтканы бар. Эң коркунучтуу кылмышкерлер үчүн жээктен 150 чакырым аралыкта жайгаша турган баржа-түрмөлөрдү түзүп, ага дрон менен көз салып турууну пландаган.