БИШКЕК, 9-янв. — Sputnik. Бишкектеги курулуш материалдарын саткан "Уста" базарында ижарачылардан мыйзамсыз акча чогултуу, ири өлчөмдө салык төлөөдөн качуу фактылары аныкталды. Бул тууралуу УКМК маалымат кызматы кабарлады.
Билдирмеге караганда, бул факт боюнча кылмыш иши козголуп, анын алкагында ар бир ижарачыдан ай сайын мыйзамсыз түрдө 5 миң сомдон 50 миң сомго чейин акча чогултуп жүргөн деп базардын коммерциялык директору кармалып, Бишкек ШИИБдин убактылуу кармоочу жайына киргизилген.
"Ал ижара төлөмдөрүн 30 пайызга чейин кыскартуу боюнча жетишилген макулдашууларга карабай ижарачылардан алдап акча алууну уланткан. Ошол эле учурда базар администрациясы соода кылгандар менен ижара келишимин түзгөн эмес. Мындай жол менен базар жетекчилиги мамлекеттик бюджетке ири өлчөмдө салыктарды жана башка милдеттүү төлөмдөрдү төлөөдөн качкан", — деп жазылат кабарда.
Учурда бул фактыга тиешеси бар бардык адамдарды аныктоо боюнча тиешелүү ыкчам-тергөө иш-чаралары жүргүзүлүп жатканы кошумчаланды.