БИШКЕК, 9-янв. — Sputnik. Ысык-Көл облусунун Түп районунда ишкердин үйүнө ууруга кирип, аны тоноп кеткендер кармалды. Бул тууралуу ИИМдин маалымат кызматы кабарлады.
Билдирмеге караганда, окуя Түп районунда 31-декабрда таңкы саат 05:00дөр чамасында болгон. Милициянын версиясы боюнча, бет капчан эки адам курал көтөрүп терезеден кирип, акча талап кылып алгач аялды сабай баштаган. Ошол учурда бөлмөгө кирип келген жолдошун темир буюм менен башка чаап, байлап коюшкан. Анан аялы менен жаш баласына бычак кезеп коркуткан. Натыйжада 120 миң сомун, телефондорун алып кетишкен.
Ысык-Көл облусунун Түп районунда ишкердин үйүнө ууруга кирип, аны тоноп кеткен шектүүлөр
© Фото / пресс-служба МВД КР
Бул боюнча Кылмыш-жаза кодексинин 207-беренесинин 2-бөлүмү ("Каракчылык") боюнча иш козголуп, шектүүлөр Бишкектен колго түшүрүлгөн.
36 жаштагы Б.Р документ жасалмалаганы үчүн Россияда издөөдө жүргөн, ал эми 37 жаштагы О.Ф. мурда соттолгону маалым болду. Экөө тең Түптүн тургундары экени айтылды.