БИШКЕК, 5-янв. — Sputnik. Ош облусундагы Кара-Суу райондук аймактык ооруканасында Медициналык тез жардам кызматын көрсөтүү бөлүмү жана мамлекеттик "Эл аман" дарыканасы ачылды. Бул тууралуу Саламаттык сактоо министрлиги маалымдап, ачылыш аземине министр Алымкадыр Бейшеналиев катышканын белгиледи.
Аймактык оорукана башчысы Дамира Бегматованын айтымында, Медициналык тез жардам кызматынын имаратын куруу долбоору 2021-жылы башталган. Ал мамлекеттик бюджеттин жана оорукананын атайын эсебинин каражатынан 32 миллион сомго курулду. Бөлүм 6 орунга ылайыкталып, медициналык кароо, изолятор, интенсивдүү терапия жана башка палаталары бар. Бейтаптарга медициналык тез жардам көрсөтүүгө зарыл болгон бардык жабдыктар менен камсыздалгандыгы маалымдалды.
Аталган оорукана Кара-Суу районундагы 460 миң жашоочуну тейлейт.
Министр Тез жардам кызматын көрсөтүү бөлүмү жашоочуларга медициналык кызмат көрсөтүүнүн сапатын жакшыртарын айткан. Мындан тышкары, ал мамлекеттик "Эл аман" дарыканаларында дары-дармектин түрү жана саны көбөйүп жатканын белгилеген. Анын айтымында, өлкөнүн аймагында аталган дарыканаларды жаңыдан ачканда анда 800 аталыштагы дары болсо, бүгүнкү күндө анын саны 1500гө жетти. Бейшеналиев мамлекеттик саламаттык сактоо мекемелеринде мындай дарыканаларды ачуу улантыларын кошумчалаган.