Алдыдагы алты жылга маданий мурас катары эстеликтерди орнотуу боюнча аймактагы бийлик өкүлдөрүнөн, бардык тиешелүү мекемелерден сунуштама сураганыбызда эпикалык каарманга эстелик орнотуу боюнча бир дагы сунуш түшкөн жок. Баары эле адамдарга айкел орнотууну каалашат. Бул тууралуу Салтанат Мамбетмусаева Sputnik Кыргызстан радиосуна маек куруп жатып билдирди.
Анын айтымында, айрым мекемелерден учурда көзү тирүү инсандарга эстелик коюуну сунуштагандар да болгон.
"Мамлекеттин өнүгүшүнө зор салым кошкон, илим, маданият же башка бир тармак боюнча тарыхта өзгөчө орду бар инсандардын эмгегин унутпай түбөлүк даңазалоо жана жаш муундарга өткөрүп берүү максатында эстелик тургузулат. Алар министрликтин алдындагы көркөм кеңештен өтүп, бирдиктүү тартипте болушу шарт. Бирок соңку жылдары бул эрежелер сакталбастан коюлган эстеликтер көбөйдү. Аны иретке келтирүү максатында токтом сунушталып жатат. Бирок, мындан сырткары, 2024-2030-жылдар аралыгында республика боюнча тургузула турган эстеликтерге сунуштамаларды кабыл алдык. Арасында көзү тирүү адамдарды сунуштагандар да болду. Мыйзам боюнча, инсан бул дүйнөдөн өткөн соң беш жылдан кийин гана эстелик орнотуу сунушталышы керек. Дагы бир өкүнүчтүү жагдай, мисалы, ошол эле Манастын Аккуласына же башка бир эпикалык каарманга эстелик орнотуу боюнча сунуштамалар болгон жок. Анан да сунуш бергенде ал инсан тууралуу маалыматты камтып, анын өздүгүн негиздеп бериши шарт. Мындай да бардык эле сунуштарда кезиккен жок. Ошентсе да келген бардык сунуштарды коом билсин, көрсүн деген максатта талкууга чыгардык", — деди Мамбетмусаева.
Ал коюлган эстеликтер тууралуу маалыматтар Санарип министрлиги менен биргеликте иштелип чыккан атайын программа менен жабдыларын кошумчалды.