БИШКЕК, 1-янв. — Sputnik. Чүй облусунун Ысык-Ата районунда Россия-Кыргыз өнүктүрүү фондунун (РКӨФ) колдоосу менен канаттуулардын заманбап фабрикасы ачылды. Бул туурасында аталган фонддун маалымат кызматынан кабарлашты.
Долбоор "Жар-птица" деп аталган дыйкан чарбасына таандык. Ишкана жылына 40 миллион жумуртка өндүрүп, сатуу планын койгон.
"Долбоорду финансылоого арыз 2022-жылдын декабрь айында берилип, апрелде келишимге кол коюлду. РКӨФ бизге 1,2 миллион доллар бөлдү. Акчаны заманбап италиялык жабдуу сатып алууга жумшадык. Фонддун бул колдоосу бизге тооктун санын жана өндүрүлгөн продукцияны көбөйтүүгө жардам берет", — деди ишкананын жетекчиси Александр Подлабухов.
РКӨФтөн бул фабрика жумуртка өндүрүүнү 60тан 70 пайызга чейин жогорулатарын айтышты.
"Фонд өлкөдөгү азык-түлүк коопсуздугун бекемдөөгө тыкыр көңүл бөлөт. Буга чейин жумуртка өндүрүү боюнча үч ишкананы каржылаганбыз. 2026-жылга чейин Кыргызстанда өзүбүздүн өндүрүштөн жумуртка менен камсыз кылууну 85 пайызга чейин жеткирели деп турабыз", — деген фонддун төрагасы Артем Новиков.
Ал РКӨФ иштегенден бери жалпы суммасы 620 миллион долларга 3 380 долбоорду каржылаган жана азыр анын ишмердүүлүгү экономиканын бардык тармактарын камтырын кошумчалады.