БИШКЕК, 31-дек. — Sputnik. АКШдагы президенттик шайлоодо ким жеңсе да Россияга баары бир. Бул туурасында РФ ТИМинин башчысы Сергей Лавров РИА Новости агенттигиндеги маегинде билдирди.
"Америкалык саясий элита кайсы партиядан экенине карабай Россияны душман жана коркунуч жаратуучу катары көрөт. Бул маселе боюнча партиялар ортосунда консенсус жаралганын эске алганда, Республикачыл партиянын талапкери жеңсе мамиле жакшырып кетерине үмүт артуу ашыкча ишенчээктик болуп калмак. Бизге негизинен АКШ президентинин креслосу үчүн жарышта ким жеңери баары бир", — деди ал.
Ошондой эле Лавров АКШ РФ менен мамилесин толук үзүп коюуга батынбастыгын, бирок Москванын кызыкчылыктарын сыйлоого даяр эместигин белгиледи.
"Вашингтон биздин түпкү улуттук кызыкчылыктарыбызды таанып, олуттуу түрдө макулдаша баштаса гана кээ бир тармактар боюнча өз ара иштешип, тынчтык формуласына келе алабыз", — деди ТИМ башчысы.
АКШда президенттик шайлоо 2024-жылдын 5-ноябрына белгиленген. Сурамжылоолор Республикачыл партиядан чыккан мурдагы президент Дональд Трамп негизги фаворит болуп жатканын көрсөтүүдө. Ага каршы учурдагы президент Жо Байден ат салышары күтүлүүдө.