БИШКЕК, 30-дек. — Sputnik. Бишкек гарнизонунун 2500дөн ашык кызматкери күчөтүлгөн тартипте иштөө режимине өттү. Бул тууралуу Бишкек ШИИББдин маалымат кызматы билдирди.
Тартип сакчылары мындай режимде 2023-жылдын 28-декабрынан 2024-жылдын 2-январына чейин иштей турганы маалым болду.
“Жаңы жылдык майрам күндөрү оюн-зоок мекемелери менен киши көп топтолгон жайлар өзгөчө көзөмөлгө алынат. Ал жерлерде ИИМдин Күзөт кызматы атайын унаалар менен коомдук тартипти сактайт”, — деп айтылат маалыматта.
Ошол эле маалда милиция кызматкерлери бир катар профилактикалык иштерди жүргүзүп, жеке менчик мейманканаларды, сауналарды текшерип, каттоодо тургандарды кыдырып жатышат. Коомдук тартипти сактоого милициянын бардык бөлүмдөрү тартылган.