БИШКЕК, 29-дек. — Sputnik. Кыргызстан менен Россиянын союздаштык мамилеси өз ара кызыкчылыктарда жана биргелешкен интеграциялык бирикмелерде, ири алдыда ЕАЭБде бекемделип жатат. Бул туурасында Россиянын Кыргызстандагы элчиси Николай Удовиченко "Акипресс" агенттигине берген маегинде айткан.
Евразиялык экономикалык биримдик социалдык-экономикалык туруктуулуктун камсыздалышынын маанилүү фактору болуп, өнүгүүнүн андан аркы багыттарын түптөп жатканын белгилеген.
Элчи Бишкекте октябрь айында ЕАЭБге мүчө мамлекеттердин премьерлери өнөр жай долбоорлорун тандап алуунун критерийлерин, аларды союздук бюджеттен каржылоону бекиткендигин эске салган.
Дипломат газдын, нефтинин жана мунай азыктарынын, андан сырткары, электр энергиясынын жалпы рынокторун иштетүүгө даярдык көрүлүп жатканын билдирген.
"Карапайым адамдар өлкөсүнүн ЕАЭБге мүчөлүгүнүн пайдасын сезип жатат. Бул — миграциялык жаатта кошумча уруксатсыз иштөө мүмкүнчүлүгүн алуу, пенсияга чыгууда эмгек стажын коштуруу, медициналык жактан бекер тейленүү. Жамааттык коопсуздук келишими уюмунун алкагында аймактагы туруктуулукту камсыздоо милдетин койгонбуз, террорчулук, экстремизм жана баңгизаттарын ташуу сыяктуу курч көйгөйлөргө каршы биргелешип күрөшүп келебиз", — деген Удовиченко.
Дипломат жогорку айтылган маселелерде абадагы кол салуудан коргонуу боюнча биргелешкен система түзүү маанилүү кадам экенин кошумчалаган.
Кыргызстандын КМШга төрагалык кылуудагы жыйынтыктары оң маанайда бааланганын, алардын бири Орус тили боюнча эл аралык уюмду түзүү чечими экенин белгилеген.