БИШКЕК, 28-дек. — Sputnik. Ош шаарында муниципалдык күрөш залы курула баштаганын мэриянын маалымат кызматы кабарлады.
Билдирмеге караганда, күрөш залы шаардагы Сай-Бою көчөсүндө салынып жатат. Калаа башчысы Бакытбек Жетигенов курулуштун жүрүшү менен таанышып, аны белгиленген убагында бүтүрүү тапшырмасын берген.
Маалым болгондой, күрөш залынын жалпы аянты 588 чарчы метр. Анда спортчулар үчүн бардык шарттар түзүлүп, жуунуучу, кийим алмаштыруучу жайлар, машыктыруучулар үчүн бөлмөлөр болору кошумчаланды.