БИШКЕК, 28-дек. — Sputnik. Бишкектеги 120 күрөөкананын жетекчилери жылдык пайыздык ченди 43%га чейин төмөндөтүү милдетин алышты. Бул тууралуу УКМК билдирди.
Атайын кызмат башка мамлекеттик органдар менен биргеликте калаадагы 120 күрөөканага текшерүү жүргүзгөн. Натыйжада кээ бир күрөөканалар очойгон үстөк пайыз (200%дан ашык) менен карыз берип, коюлган автоунааларды кожоюнуна айтпастан колдонуу фактылары аныкталган.
"120 күрөөкананын жетекчилери жылдык пайыздык ченди 43%га төмөндөтүүгө милдеттендирилди", — деп айтылат маалыматта.
Эртең, 29-декабрда, Экономика министрлигине бардык күрөөканалардын жетекчилери чакырылып, иштөөнүн жаңы эрежелери тууралуу маалымат берилет.
Буга чейин Чүй облусундагы күрөөкана ээлери элге акчаны 20 пайыздан ашырбай бере турганы кабарланган.