БИШКЕК, 26-дек. — Sputnik. Ноокат районунун Найман айыл өкмөтүнүн аймагында таш майдалоочу завод жана асфальт-бетон чыгаруучу завод салынып жатат. Бул туурасында президенттин Ош облусундагы өкүлчүлүгү билдирди.
Курулушка 10 гектар жер тилке бөлүнгөн, асфальт заводунун өндүрүмдүүлүгү саатына 80 тоннаны түзөт.
Облус башчысы Элчибек Жантаев тиешелүү жетекчилер менен жеринде жолугушуу өткөрүп, курулуштун кээ бир аспектилерин талкуулаган. Ал жергиликтүү бийликке курулуш иштерине ар тараптуу жардам берүү тапшырмасын берип, иш жеке көзөмөлүндө болорун билдирген.
"Бул жаңы ишканалар жумуш орундарын түзүүгө гана жардам бербестен, жергиликтүү инфраструктураны да өнүктүрөт. Алар жол куруу үчүн сапаттуу материалдар менен камсыз кылууда негизги ролду ойноп, аймактын экономикасынын өнүгүшүнө оң таасирин тийгизет", — деп айтылат маалыматта.
Завод "Кыргыз автожол" мамлекеттик ишканасынын Оштогу филиалы тарабынан курулат.