БИШКЕК, 23-дек. — Sputnik. Ички иштер министрлиги 2024-жылы жарандардын коопсуздугун камсыздоо максатында төрт ири долбоорду ишке киргизерин билдирди.
Министр Уланбек Ниязбеков аталган иштерди жүзөгө ашыруу үчүн келишимдерди түзүп, макулдашуудан өткөргөнүн айткан.
Биринчи долбоор — ДНК анализдерин аныктоо үчүн лаборатория куруу. Анын пайдаланууга берилиши эксперттик криминалистиканы чыңдап, модернизациялап, потенциалын жогорулатат;
Экинчи — санарип инфратүзүмдү жакшыртуу үчүн ИИМдин бардык түзүмдүк бөлүктөрүндө "Санарип булут" технологиясы киргизилет. Бул кадам ыкчам маалыматтарды алууга жана жеринде иликтөөлөрдү жүргүзүү сапатын жакшыртууга өбөлгө түзөт;
Үчүнчү — "Жеткиликтүү милиция" аталышындагы программанын алкагында милициянын көчмө кабылдамаларынын ишмердигин күчөтүп, элди тейлөө сапатын кеңейтип, жаңы форматка чыгуу;
Төртүнчү — элдин коопсуздугун туруктуу деңгээлде камсыздоо боюнча "Экстремизмге жана террорчулукка каршы күрөшүү борбору" түзүлөт.
Министрлик эмдиги жылга карата мындай өңүттөгү бир катар долбоорлор даярдалып жатканын кошумчалады.