БИШКЕК, 21-дек. – Sputnik. Садыр Жапаров бүгүн, 21-декабрда, Нарын облусуна болгон жумушчу сапарынын алкагында кыргыз-кытай мамлекеттик чек арасындагы жаңыланган "Торугарт 2" көзөмөл-өткөрүү пунктун (КӨП) ачты. Бул тууралуу президенттин маалымат кызматы билдирди.
Ага ылайык, бүгүнкү күндө "Торугарт-2" комплексинин административдик имараты реконструкцияланып, алты кыймыл тилкеси орнотулду.
"Мында бир эле учурда алты транспорт каражатына карата бажы көзөмөлү жүргүзүлүшү мүмкүн. Мындан тышкары, өткөрүү пунктунун аймагын жакшыртуу жана натыйжалуу пайдалануу үчүн эски курулмаларды бузуу, кошумча унаа токтотуучу жайларды орнотуу, транспорт каражаттарынын кыймылынын схемасын оптималдаштыруу боюнча иш-чаралар жүргүзүлүүдө. Ал эми чек арачылар үчүн жатаканалар оңдолууда", - деп айтылат маалыматта.
Бекеттин ишмердүүлүгү менен таанышкан Садыр Жапаров келерки жылдын жаз айларынан тарта жумуш убактысын 24/7 графигине өткөрүүнү сунуштады.