Жүргүнчү көз жумган. ЖКККББ Кочкордо инспектор аралашкан окуя тууралуу

Мекеме айдоочу эмес жүргүнчү көз жумганын, буга инспектордун тиешеси жок экенин билдирди.
Sputnik
БИШКЕК, 21-дек. — Sputnik. Жол кыймылынын коопсуздугун камсыздоо башкы башкармалыгы Кочкор районунда жол инспектору сабалып каза болгон айдоочунун өлүмүнө шектелүүдө деген маалымат боюнча үн катты.
Буга чейин активист Эртай Искаков айдоочуга Тез жардам чакырылып, бирок ал ооруканага жетпей жолдо каза болгонун, инспектор азыр боштондукта экенин билдирген.
Маалыматка ылайык, айдоочу эмес, жүргүнчү көз жумган. Окуя 12-декабрда Кочкордун Жаңы-Жол айылында болгон. Анда Б.Т. аттуу айдоочу жана Т.Т. деген жүргүнчү “Москвич” унаасы менен рулду башкара албай арыкка кирип кеткен. Инспектор аларга жардам берейин деп барып, мас экенин байкайт. Аны аныктоо үчүн наркологияга баралы дегенде берки экөө каршылык көрсөткөнү айтылат. Акыр-аягы наркологиядан текшертип, спирт ичимдигин ичкендиги аныкталып, унаа айып короого токтотулган. Айдоочуга болсо тиешелүү протокол түзүлгөн.
“Ал эми жүргүнчү жакшы эле абалда болуп, түнү Кочкор РИИБине кызматкерге карата тийиштүү чара көрүү үчүн арыз жазып үйүнө кеткен. Бул видеожаздырууда бар”, – деп жазылган маалыматта.
Учурда бул факт боюнча тийиштүү экспертизалар дайындалып, бардык материалдар УКМКга өткөрүлгөн.
УКМК: Жалал-Абадда милиционер баңгизат сатып жатканда кармалды