БИШКЕК, 20-дек. — Sputnik. Америкалык генерал, АКШ армиясынын Европадагы күчтөрүнүн бирин мурда башкарган Бен Хожес аскерге жарактуу курактагы украиналыктарды мобилизациялоо боюнча пикирин билдирген.
Анын айтымында, "Украинада аскерге чакырылуучу курактагы аялдар менен эркектер көп жүрөт, аларды армияга алыш керек".
Генерал чет жактардагы украиналыктар туурасында да оюн билдирген.
"Андан сырткары, Германияда, Польшада жана Румынияда миңдеп жүрүшөт. Украинада бул системаны оңдоп, ден соолугу чың эркектер менен аялдарга аскердик форма кийгизүү шарт", — деген Бен Хожес.
Эскерте кетсек, Украинада 2022-жылдын февралынан тарта аскердик абал режими кирип, жалпы мобилизация тууралуу жарлык иштеп келет. 18 жаштан 60 жашка чейинки эркектерге өлкө аймагынан чыгууга тыюу салынган. Аскердик милдетинен баш тарткандар беш жылга эркинен ажыратылышы мүмкүн.