Кыргызстанда 1-октябрдан 31-октябрга чейин "Аялдар ден соолугу" аттуу бир айлык акция өттү. Бул тууралуу Ибрагимбек Алиев Sputnik Кыргызстан радиосунун эфиринде маек куруп жатып билдирди.
Анын айтымында, аталган акциянын алкагында 400 миңден ашык аял профилактикалык кароодон өттү.
"Бул долбоордун максаты — маалымдуулукту жогорулатуу жана сапаттуу медициналык кызмат көрсөтүү аркылуу аялдар арасында жугуштуу эмес ооруларды алдын алуу жана эрте диагностика коюу. Анткени өтүшүп кеткен ооруну дарылоого караганда аны алдын алып, дарылоо жеңилирээк. Мындай акциялар элдин маалыматын жогорулатууга шарт түзөт. Аялдар профилактикалык кароодон өтүп, ден соолугунда кандай маселе бар экенинен кабардар боло алат. Аталган акция жыл сайын Кыргызстан менен бирге эле дүйнө жүзүндө уюштурулуп келет", — деди Алиев.
Ал аялдарды маал-маалы менен текшерүүдөн өтүп турууга чакырып кетти.